PASIAN A LUNGDUAI ZAWH NAWNLOH CIANG

PASIAN A LUNGDUAI ZAWH NAWNLOH CIANG
Piancilna 6:1-8

Sia Thang Sian Suum Mung (Suum Mung)

“Leitung ah mite tam dingin hong kipan in,amau’ sung panin tanute hong suah ciangin, Pasian’ tapate in mite’ tanute hoih sa uh ahihman in a deih bangun tua te zi-in a la uh hi. TOPA in, “Keima Kha in mihing tawh kilai den lo ding hi. Banghang hiam cihleh amah in zong ci leh sa mah a hi hi. Tua ahih ciangin, amah in kum 120 anungta ding hi,”a ci hi. Pasian’ tapate in mihing’ tanute luppih in, amaute in ta a neih hun laitak hita leh tua khit hita leh, amau’ suan lekhak Nefilim a ki ci mite leitung ah om hi.Hih mite in tanglai a mi thahat a, mi minthang te a hi uh hi.Leitungah mihing a gitlohna a liatna leh mihing lungsim ngaihsutna peuhmah a sia ahih ngitngetna thu TOPA khial kisa a, tua thu in a ma lungsim dahsak hi . Tua ahih ciangin TOPA in, “Ka piansaksa mihing, ganhing, a bokvak ganhingte leh huih lak vasa te, leitung panin ka phiatkhia ding hi; banghang hiam cihleh amaute ka bawl ka khial hi,”a ci hi. Ahih hangin Noah in TOPA’ maipha a mu hi.”

Tuhun ciang in Pasian ong lungduai zo nawnlo in siatna ong tung ding hi cih thupen pulpit tungpan kigen ngei nawnlo in, a lungduai Pasian, a mite thupha a pianuam Pasian cihbang in Pasian‟hoihna bekbek gen in kinei zaw ta hi. A hihhang in Lai Siangtho sung, a phadiak in Lai Siangtho lui sung ah Pasian‟ hehna, Pasian‟ thangpaihna leh a mite tung ah a lungduai zawh nawnlohna thute kimu mun mahmah hi. Leitung mite‟ginatlohna, mawhna leh thaangtatna hang in Pasian zong ong lungduai zo nawnlo a hihman in Noah te innkuan lobuang leitung mi khempeuh tuiciin tawh na susia hi. Hihteng ah Pasian‟ lungduaina pen kiciangtan hi cih ih phawk ding nakpi tak in thupi ding hi. Pasian pen a lungduai Pasian a hihhang in a heh theilo Pasian hilo hi. A lungduai mahmah hang in a kiciangtan hun na om hi. Kha Siangtho in mite‟ lungsim sung ah kisiik un, kikhel unla piangthak un (Zeisu um un) ci in thuum in na ong sem tawntung lo ding hi (Piancilna 6:3).

I. PASIAN IN MITE’ LUNGSIM SUNG AH NASEM IN MAWHNEITE SAM LAI HI.
Mihingte in Pasian thu mang nuam lo, a lehdo, a langpan tawntungte hi uh a, a piangthakte pen tua Kha Siangtho nasepna, zolna leh thuumna a mangte na hi uh hi. Kha Siangtho in mite a pianthak nading in a lungsim uah na a sep tak ciang in a pua lam ah khat veivei kilang khia thei hi. Pawlkhatte bang a khitui khawng ong mualtuang in, a muk khawng uh ong liing kelhkelh in, a gawl khawng uh ong binggawp zong pawlkhat om thei hi.Tua bang in Kha Siangtho in mite‟ lungsim sung ah na nakpi tak in ong sep tak ciang in a sibup nangawn zongh ki-om thei hi.
Hihthu in Pasian in mihingte a it mahmah na leh kisikkik in ama kiang a zuatkik ding a lunggulhna thu kimu thei hi. Hih bang in Pasian in a mangthang mawhneite ong zong masa hi kei leh cikmah hun in Ama kiang ih tung zo ngei kei ding hi. A hihhang in
II. PASIAN A LUNGDUAI ZAWH NAWNLOH HUN OM HI.
Noah hunlai a mite in, Noah‟ tembaw bawlna thu,tuiciin tun ding thu leh mihingte a mawhna uh pan kisikkik a Pasian kiang a zuatkik ding uh a kulna thute Noah‟ genna tungtawn in a theih uh hang in awlmawh lo in na nuihsan lel uh hi. Tua hun laitak a mite in hihbang thupen a piangthei ding in ngaihsun theilo uh hi.Banghang hiam cihleh Noah‟ hun ciangciang , guah khat vei zong zu ngei nailo a hihman in tuiciin tung ding cihpen mite in ngaihsun thei peuhmah lo uh hi.Pasian in lungduai tak in mihingte ama kiang a zuatkik ding kum 120 vilvel sung a ngak keeikaai hang in, Noah te innkuan lobuang kuamah in na awlmawh lo uh a, Pasian zong a lungduai zawhnawn loh hun a thuakzawh nawn loh hun ong tungta hi. A itna leh a lungduaina a lah mah bang in a thumaanna a lah ding hun ong tungta hi.
Pasian in Abraham kiang ah, “Amor mite mawhna kicing nailo hi”(Piancilna 15:16), a cih zawh kum 400 khit ciang in Pasian in hih mite na susia pan hi (Thuhilhkikna 20:16,17). Israel mite tung ah Pasian in a kiciangtan lo hehpihna leh lungduainate lak in khang khat khit khang khat kamsangte tungtawn in a deihna leh a lunggulhnate theisak a tua thuhilhnate mangnuam lo in a om teitei uh leh a galte khut sung khawng
ah tungsak in guallelhna, maizumna,simmawhna leh sihna nangawn tawh thu na hilh zeuhzeuh thei hi. A hihhang in , a galte‟ khutsung pan a suakta lai mi tawm note tung ah a itna lakkik in a gam a lei uh ngahsak kik a Biakinn khawng ong nei kik uh hi. A hihhang in Honpa Zeisu Khazih ong pai ciang in na
Pasian pen a lungduai Pasian a hihhang in a heh thei lo Pasian hi lo hi.
nial uh a hihman in Topa Zeisu‟ genkholh mahbang in A.D. 70 kum in Zawmah galkapmang Titus in Jerusalem ongla a Biakinn pi suksiatsak gawp hi. Hih thute ih et ciang in Pasian‟ lungduaina in kiciangtan hun a neihluat lam kimu thei hi.
III. PASIAN IN NA A SEP NAWNLOH CIANG IN SUKSIATNA THAKHAT THU IN TUNG HI.
Tuiciin a tunma in zong mihingte a ut bangbang un om in, zu leh sa tawh kidiah in ,Pasian cih peuhmah phawkkhak in a neihloh laitak un thakhat thu in siatna (tuiciin) ong tung hi (Piancilna 6:7;Paunak 29:1). Pasian in danpiakna, thuhilhna leh siatna ong tunsak ma in hilhkholhna (warning)ong nei masa tawntung a hihlam Lai Siangtho sung ah kician tak in kimu thei hi.Pasian in Sodom leh Gomorrah kat leh meikuang tawh a suksiat ma in hilhkholhna na nei hi. Tuamah bang in, Pasian in mite tung ah genkholhna kum 120 sung vilvel Noah tungtawn in nei napi kuamah in na thusimlo a hihman in Noah te innkuan leh teembaw sung a om ganhing teng lobuang leitung vannuai a om husang thei khempeuh in Pasian‟ thukhenna thuak in a suakta khat zong na om lo uh hi.
Nikhat ni ciang in Kha Siangtho in na lungsim sung ah na ong sep nawnloh hun ong tung ding hi.Tua hun ciang in Pasian‟ thukhenna pen nidang a te sang in ong nasia zaw tham ding a, tuiciin cih bang ciang tawh ong hi nawnlo in a tawntung in a kuang meitawh thu a khen hun ong tung ding hi. Tuabang hun cikciang ong tung ding cih a thei kuamah om lo a Kha Siangtho in na lungsim sung ah na a sep lai aleh a hampha mahmah na hihlam ong phawksak phapha nuam ing. Banghang hiam cihleh nang a ding in hun om lai a hihman in Topa Zeisu pen Honpa leh Topa in sangpak in. Noah‟ hun lai a mite in Pasian‟ thu na ngai uh hileh tuabang in Pasian in siatna na tungsak lo ding hi. A hihhang in hih mite in Kha Siangtho nasepna awlmawh lo in nial thapaai uh a hihman in a tawpna ah Kha  Siangtho‟nasep na hih mite tung ah om nawnlo hi (Piancilna 6:3). Kong it sanggam aw, tu ni in nang ading hun a hoihpen ni hi. Kha Siangtho‟ nasepna a bei ma, Pasian‟ hehna ong kibuak ma, Pasian‟ lungduaina ong beima in na mawhnate pan kisiik in,Zeisu Khazih Honpa leh Topa in sang pak in. A hunlap lai hi teh!
-----------------------------------------------------------------------------------------------
Nuntakna Lampi Lom 1, Hawm 4 July – August 2013 pan kila hi.